vishnustavaraja stotram

padmovAcha |
yogena siddhavibudhaiH paribhAvyamAnaM lakShmyAlayaM tulasikAchitabhaktabhRRi~Ngam |
prottu~NgaraktanakharA~NgulipatrachitraM ga~NgArasaM haripadAmbujamAshraye.aham || 1||

gumphanmaNiprachayaghaTTitarAjahaMsasi~njatsunUpurayutaM padapadmavRRindam |
pItAmbarA~nchalavilolachalatpatAkaM svarNatrivakravalayaM cha hareH smarAmi || 2||

jaMghe surpaNagalanIlamaNipravRRiddhashobhAspadAruNamaNidyuticha~nchumadhye |
AraktapAdatalalambanashobhamAne lokekShaNotsavakare cha hareH smarAmi || 3||

te jAnunI makhapaterbhujamUlasa~Ngara~NgotsavAvRRitataDidvasane vichitre |
cha~nchatpatatrimukhanirgatasAmagItavistAritAtmayashasI cha hareH smarAmi || 4||

viShNoH kaTiM vidhikRRitAntamanojabhUmiM jIvANDakoshagaNasa~NgadukUlamadhyAm |
nAnAguNaprakRRitipItavichitravastrAM dhyAye nibaddhavasanAM khagapRRiShThasaMsthAm || 5||

shAntodaraM bhagavatastrivaliprakAshamAvartanAbhivikasadvidhijanmapadmam |
nADInadIgaNarasotthasitAntrasindhuM dhyAye.aNDakoshanilayaM tanulomarekham || 6||

vakShaH payodhitanayAkuchaku~Nkumena hAreNa kaustubhamaNiprabhayA vibhAtam |
shrIvatsalakShma harichandanajaprasUnamAlochitaM bhagavataH subhagaM smarAmi || 7||

bAhU suveShasadanau valayA~NgadAdishobhAspadau duritadaityavinAshadakShau |
tau dakShiNau bhagavatashcha gadAsunAbhatejorjitau sulalitau manasA smarAmi || 8||

vAmau bhujau muraripordhRRitapadmasha~Nkhau shyAmau karIndrakaravanmaNibhUShaNADhyau |
raktA~NguliprachayachumbitajAnumadhyau padmAlayApriyakarau ruchirau smarAmi || 9||

kaNThaM mRRiNAlamamalaM mukhapa~Nkajasya lekhAtrayeNa vanamAlikayA nivItam |
kiMvA vimuktivashamantrakasatphalasya vRRintaM chiraM bhagavataH subhagaM smarAmi || 10||

vaktrAmbujaM dashanahAsavikAsaramyaM raktAdharauShThavarakomalavAksudhADhyama |
sanmAnasodbhavachalekShaNapatrachitraM lokAbhirAmamamalaM cha hareH smarAmi || 11||

sUrAtmajAvasathagandhamidaM sunAsaM bhrUpallavaM sthitilayodayakarmadakSham |
kAmotsavaM cha kamalAhRRidayaprakAshaM sa~nchintayAmi harivaktravilAsadakSham || 12||

karNau lasanmakarakuNDalagandhalolau nAnAdishAM cha nabhasashcha vikAsageham |
lolAlakaprachayachumbanaku~nchitAgrau lagnau harermaNikirITataTe smarAmi || 13||

bhAlaM vichitratilakaM priyachArugandhagorochanArachanayA lalanAkShisakhyam |
brahmaikadhAmamaNikAntakirITajuShTaM dhyAye manonayanahArakamIshvarasya || 14||

shrIvAsudevachikuraM kuTilaM nibaddhaM nAnAsugandhikusumaiH svajanAdareNa |
dIrghaM ramAhRRidayagAshamanaM dhunantaM dhyAye.ambuvAharuchiraM hRRidayAbjamadhye || 15||

meghAkAraM somasUryaprakAshaM subhrUnnAsaM shakrachApaikamAnam |
lokAtItaM puNDarIkAyatAkShaM vidyuchchailaM chAshraye.ahaM tvapUrvam || 16||

dInaM hInaM sevayA daivagatyA pApaistApaiH pUritaM me sharIram |
lobhAkrAntaM shokamohAdividdhaM kRRipAdRRiShTyA pAhi mAM vAsudeva || 17||

ye bhaktyA.adyAM dhyAyamAnAM manoj~nAM vyaktiM viShNoH ShoDashashlokapuShpaiH |
stutvA natvA pUjayitvA vidhij~nAH shuddhA muktA brahmasaukhyaM prayAnti || 18||

padmeritamidaM puNyaM shivena paribhAShitam |
dhanyaM yashasyamAyuShyaM svargyaM svastyayanaM param || 19||

paThanti ye mahAbhAgAste muchyante.ahaso.akhilAt |
dharmArthakAmamokShANAM paratreha phalapradam || 20||

| iti shrIkalkipurANe.anubhAgavate bhaviShye padmAprokto viShNustavarAjaH sampUrNam|