bhagvad dhyana sopanam.

shrImAn ve~nkaTanAthAryaH   kavi-tArkika-kesarI

    vedAntAcArya-varyo me       saMnidhattAm sadA hR^idi

antarjyotiH kimapi yaminAm a~njanaM yoga-dR^iShTeH

        cintA-ratnaM sulabham iha naH siddhi-mokShAnurUpam

    dInAnAtha vyasana-shamanaM daivataM daivatAnAM

        divyaM cakShuH shruti-pariShadAM dR^iShyate ra~Nga-madhye

velAtIta-shruti-parimaLaM vedhasAM mauLi-sevyaM

        prAdurbhUtaM kanaka-saritaH saikate haMsa-juShTe

    lakShmI-bhUmyoH kara-sarasijairlAlitaM ra~Nga-bhartuH

        pAdAmbhojaM pratiphalati me bhAvanA-dIrghikAyAm

  citrAkArAM kaTaka-rucibhishcAru vR^ittAnupUrvAM

        kAle dUtya drutataragatiM kAnti lIlA kalAcIm

    jAnucchAyA dviguNa-subhagAM ra~Nga-bharturmadAtmA

        ja~NghAM dR^iShTvA janana-padavI jA~NghikatvaM jahAti

  kAmArAma-sthira-kadalikA-stambha-saMbhAvanIyaM

      kShaumAshliShTaM kimapi kamalA-bhUmi-nILopadhAnam

    nya~ncatkA~ncI-kiraNa-ruciraM nirvishatyUru-yugmaM

      lAvaNyaugha-dvayam iva matirmAmikA ra~Nga-yUnaH

saMprINAti pratikalam asau mAnasaM me sujAtA

      gambhIratvAt kvacana samaye gUDha-nikShipta-vishvA

    nAlIkena-sphurita-rajasA vedhaso nirmimANA

      ramyAvarta-dyuti-sahacarI ra~NganAthasya nAbhiH

  shrIvatsena prathita-vibhavaM shrI-pada-nyAsa-dhanyaM

      madhyaM bAhvormaNivara-rucA ra~njitaM ra~Nga-dhAmnaH

    sAndracchAyaM taruNa-tulasI-citrayA vaijayantyA

      santApaM me shamayati dhiyashcandrikodAra-hAram

  ekaM lIlopahitam itaraM bAhum AjAnu-lambaM

      prAptA ra~Nge-shayiturakhila-prArthanA-pArijAtam

    dR^iptA seyaM dR^iDha-niyamitA rashmibhirbhUShaNAnAM

      cintA-hastinyanubhavati me citram AlAna-yantram

sAbhiprAya-smita-vikasitaM cAru-bimbAdharoShThaM

      duHkhApAya-praNayini jane dUra-dattAbhimukhyam

    kAntaM vaktraM kanaka-tilakAla~NkR^itaM ra~Nga-bhartuH

      svAnte gADhaM mama vilagati svAgatodAra-netram

mAlyairantaH sthira-parimaLairvallabhA-sparsha-mAnyaiH

        kupyaccoLI vacana-kuTilaiH kuntalaiH shliShta-mUle

    ratnApIDa dyuti shabaLite ra~Nga-bhartuH kirITe

        rAjanvatyaH sthitim adhigatA vR^ittayashcetaso me

    pAdAmbhojaM spR^ishati bhajate ra~NganAthasya ja~NghAM

        Urudvandve vilagati-shanair Urdhvam abhyeti nAbhim

    vakShasyAste valati bhujayormAmikeyaM manIShA

        vaktrAbhikhyAM pibati vahate vAsanAM mauLi-bandhe

kAntodArairayam iha bhujaiH ka~NkaNajyA kiNA~NkaiH

        lakShmI-dhAmnaH pR^ithula-paridhairlakShitAbhIti-hetiH

    agre kiMcit-bhujaga-shayanaH svAtmanaivAtmanaH san

        madhye ra~NgaM mama ca hR^idaye vartate sAvarodhaH

ra~NgAsthAne rasika-mahite ra~njitAsheSha-citte

        vidvatsevA vimala-manasA ve~NkaTeshena-kL^iptam

    akleshena-praNihita-dhiyAm ArurukShoravasthAM

        bhaktiM gADhAM dishatu bhagavad-dhyAna-sopAnam etat

kavi-tArkika-simhAya        kalyANa-guNa-shAline

    shrImate ve~nkaTeshAya      vedAnta-gurave namaH