|| gItArtha saMgraha ||
svadharmaj~nAnavairAgyasAdhyabhaktyekagocharaH |
nArAyaNaH paraM brahma gItAshAstre samIritaH || 1||
j~nAnakarmAtmike niShThe yogalakShye susaMskRRite |
AtmAnubhUtisiddhyarthe pUrvaShaTkena chodite || 2||
madhyame bhagavattattvayAthAtmyAvAptisiddhaye |
j~nAnakarmAbhinirvartyo bhaktiyogaH prakIrtitaH || 3||
pradhAnapuruShavyaktasarveshvaravivechanam |
karmadhIrbhaktirityAdiH pUrvasheSho.antimoditaH || 4||
asthAnasnehakAruNyadharmAdharmadhiyAkulam |
pArthaM prapannamuddishya shAstrAvataraNaM kRRitam || 5||
nityAtmAsa~NgakarmehAgocharA sA~NkhayayogadhIH |
dvitIye sthitadhIlakShA proktA tanmohashAntaye || 6||
asaktyA lokarakShAyai guNeShvAropya kartRRitAm |
sarveshvare vA nyasyoktA tRRitIye karmakAryatA || 7||
prasa~NgAtsvasvabhAvoktiH karmaNo.akarmatAsya cha |
bhedA j~nAnasya mAhAtmyaM chaturthAdhyAya uchyate || 8||
karmayogasya saukaryaM shaighrayaM kAshchana tadvidhAH |
brahmaj~nAnaprakArashcha pa~nchamAdhyAya uchyate || 9||
yogAbhyAsavidhiryogI chaturdhA yogasAdhanam |
yogasiddhissvayogasya pAramyaM ShaShTha uchyate || 10||
svayAthAtmyaM prakRRityAsya tirodhishsharaNAgatiH |
bhaktabhedaH prabuddhasya shraiShThyaM saptama uchyate || 11||
aishvaryAkSharayAthAtmyabhagavachcharaNArthinAm |
vedyopAdeyabhAvAnAmaShTame bheda uchyate || 12||
svamAhAtmyaM manuShyatve paratvaM cha mahAtmanAm |
visheSho navame yogo bhaktirUpaH prakIrtitaH || 13||
svakalyANaguNAnantyakRRitsnasvAdhInatAmatiH |
bhaktyutpattivivRRidhdyarthA vistIrNA dashamoditA || 14||
ekAdashe svayAthAtmyasAkShAtkArAvalokanam |
dattamuktaM vidiprAptyorbhaktyekopAyatA tathA || 15||
bhakteshshraiShThayamupAyoktirashaktasyAtmaniShThatA |
tatprakArAstvatiprItirbhakte dvAdasha uchyate || 16||
dehasvarUpamAtmAptiheturAtmavishodhanam |
bandhaheturvi vekashcha trayodasha udIryate || 17||
guNabandhavidhA teShAM kartRRitvaM tannivartanam |
gatitrayasvamUlatvaM chaturdasha udIryate || 18||
achinmishrAdvishuddhAchcha chetanAtpuruShottamaH |
vyApanAdbharaNAtsvAmyadanyaH pa~nchadashoditaH || 19||
devAsuravibhagoktipUrvikA shAstravashyatA |
tattvAnuShThAnavij~nAnasthemne ShoDasha uchyate || 20||
ashAstramAsuraM kRRitsnaM shAstrIyaM guNataH pRRithak |
lakShaNaM shAstrasiddhasya tridhA saptadashoditam || 21||
Ishvare kartRRitAbuddhissattvopAdeyatAntime |
svakarmapariNAmashcha shAstrasArArtha uchyate || 22||
karmayogastapastIrthadAnayaj~nAdisevanam |
j~nAnayogo jitasvAntaiH parishuddhAtmani sthitiH || 23||
bhaktiyogaH paraikAntaprItyA dhyAnAdiShu sthitiH |
trayANAmapi yogAnAM tribhiranyonyasa~NgamaH || 24||
nityanaimittikAnAM cha parArAdhanarUpiNAm |
AtmadRRiShTestrayo.apyete yogadvAreNa sAdhakAH || 25||
nirastanikhilAj~nAno dRRiShTvAtmAnaM parAnugam |
pratilabhya parAM bhaktiM tayaivApnoti tatpadam || 26||
bhaktiyogastadarthI chetsamagraishvaryasAdhakaH |
AtmArthI chettrayo.apyete tatkaivalyasya sAdhakAH || 27||
aikAntyaM bhagavatyeShAM samAnamadhikAriNAm |
yAvatprApti parArthI chettadevAtyantamashnute || 28||
j~nAnI tu paramaikAntI tadAyattAtmajIvanaH |
tatsaMshleShaviyogaikasukhaduHkhastadekadhIH || 29||
bhagavaddhyAnayogoktivandanastutikIrtanaiH |
labdhAtmA tadgataprANamanobuddhIndriyakriyaH || 30||
nijakarmAdi bhaktyantaM kuryAtprItyaiva kAritaH |
upAyatAM parityajya nyasyeddevetu tAmabhIH || 31||
ekAntAtyantadAsyaikaratistatpadamApnuyAt |
tatpradhAnamidaM shAstramiti gItArthasa~NgrahaH || 32||
This is a 32 verse work which has covered the essence of the
Bhagavad Gita from the Shri Vaishnava point of view. Shri RAmAnuja has
followed it very closely in his gItA bhAshya.
No comments:
Post a Comment